ប្រេស៊ីល៖ ​ប្រភពពីសារព័ត៌មាន CNN បានចុះផ្សាយថា លោកប្រធានាធិបតីប្រេស៊ីល Luiz Inacio Lula da Silva បានបញ្ជូនទីប្រឹក្សាគោលនយោបាយការបរទេសកំពូលរបស់ខ្លួន ទៅជួបជជែកពិភាក្សាជាមួយប្រធានាធិបតីរុស្សី លោក Vladimir Putin អំពីកិច្ចចរចាសន្តិភាពដ៏មានសក្តានុពលដើម្បីបញ្ចប់សង្រ្គាមនៅអ៊ុយក្រែន។

បេសកជនពិសេស លោក Celso Amorim បានថ្លែងប្រាប់សារព័ត៌មានថា វាជាការនិយាយបំភ្លៃទាំងស្រុងថា ទ្វារសម្រាប់ការចរចាសន្តិភាពត្រូវបានបើកចំហ ប៉ុន្តែបើនិយាយថាវាត្រូវបានបិទទាំងស្រុងក៏មិនត្រឹមត្រូវដែរ។ គួរបញ្ជាក់ថា លោក Celso Amorim ធ្លាប់កាន់ការងារជារដ្ឋមន្រ្តីការបរទេសប្រេស៊ីលក្រោមការដឹកនាំរបស់លោក Lula ពីឆ្នាំ២០០៣ ដល់ឆ្នាំ២០១០ បាននិយាយថា លោកបានជួបជាមួយលោក Putin រយៈពេលមួយម៉ោងកាលពីថ្ងៃព្រហស្បតិ៍នៅឯវិមានក្រឹមឡាំង ដែលជាផ្នែកមួយនៃទស្សនកិច្ចមិនបានប្រកាសជាមុនរបស់លោក។ 

បន្ថែមពីលើនេះមន្រ្តីរដ្ឋាភិបាលប្រេស៊ីលពីររូបទៀតក៏បានទម្លាយប្រាប់មកកាន់សារព័ត៌មានថា លោក Amorim ក៏បានចូលចតនៅក្នុងប្រទេសបារាំង នារដ្ឋធានីប៉ារីសអំឡុងទស្សនកិច្ចរបស់លោកផងដែរ ប៉ុន្តែមិនបាននិយាយលម្អិតពីគោលបំណងនៃការចូលចតនេះឡើយ។ ក្រសួងការបរទេសប្រេស៊ីល រួមជាមួយការិយាល័យប្រធានាធិបតីពុំមានការឆ្លើយតបណាមួយឡើយ ជុំវិញដំណើរទស្សនកិច្ចរបស់បេសកជនពិសេសនេះ។ 

ជាងនេះទៅទៀត លោក Amorim បានបញ្ជាក់ថា លោកបានជួបជជែកពិភាក្សា និងទទួលទានអាហារថ្ងៃត្រង់ជាមួយលោករដ្ឋមន្រ្តីការបរទេសរុស្សី Sergei Lavrov ដែលគ្រោងនឹងធ្វើដំណើរទស្សនកិច្ចមកកាន់ទីក្រុង Brasilia នាថ្ងៃទី១៧ ខែមេសានេះ ព្រមទាំងត្រូវបានទទួលដោយលេខាធិការនៃក្រុមប្រឹក្សាសន្តិសុខ លោក Nikolai Patrushev និងទីប្រឹក្សាកិច្ចការអន្តរជាតិ លោក Yuri Ushakov ផងដែរ៕